கைக் குழந்தையுடன் உணவு டெலிவரி செய்யும் ரியல் சிங்கப்பெண் - குவியும் பாராட்டுகள்

சென்னை நுங்கம்பாக்கத்திற்கு அருகே உள்ள சாலை அருகே உணவு டெலிவரி செய்யும் பெண் ஒருவர் குழந்தையுடன் டிவிஎஸ் மோட்டார் சைக்கிளில் இருக்கும் புகைப்படம் ஒன்று சமூக வலைத்தளத்தில் வைரலாகி வருகிறது.

பெண்கள் அனைத்துத் துறைகளிலும் தங்களது திறமைகளை காட்டி வருகின்றனர். ஆண்கள் அதிகமாக வேலைசெய்யும்  உணவு டெலிவரி செய்யும் பணிகளில் தங்களை பெண்கள்  ஈடுபடுத்திக் கொள்கின்றனர். அந்த வகையில், சென்னை நுங்கம்பாக்கத்திற்கு அருகே உள்ள சாலை அருகே உணவு டெலிவரி செய்யும் பெண் ஒருவர் குழந்தையுடன் டிவிஎஸ் மோட்டார் சைக்கிளில் இருக்கும் புகைப்படம் ஒன்று சமூக வலைத்தளத்தில் வைரலாகி வருகிறது.

உபர் உணவு டெலிவரி நிறுவனத்தில் வேலை செய்யும் இந்த பெண்ணின் பெயர் வள்ளியம்மா. இவருக்கு வயது 37 . குடும்பச்சூழல் காரணமாக உணவு டெலிவரி வேலையின் ஈடுபட்டுள்ளதாக தெரிவிக்கிறார். மேலும், தான் இந்த வேலையை எந்த வித சுமையும் இன்றி மனநிறைவுடன் செய்வதாகவும் தெரிவித்துள்ளார். வள்ளியம்மாவின் புகைப்படம் நெட்டிசன்களை நெகிழ்ச்சியில் ஆழ்த்தியுள்ளது. தனது குழந்தையுடன் சென்று கொளுத்தும் வெயிலில் உணவு டெலிவரி செய்யும் பெண்ணுக்கு பலர் வாழ்த்துகளைத் தெரிவித்து வருகின்றனர். மேலும் இவரை சிங்கப்பெண், உழைக்கும் மகளிர் என பொதுமக்கள் பாராட்டுக்கள் தெரிவித்து வருகின்றனர்.